fredag 31. august 2007

Arbeidarpartiet, Høgre og kommuneøkonomien

Kvar einaste dag i valkampen er Arbeidarpartiet sine kandidatar i avisa og forsvarar alt det galne dei har gjort, og skryt over at dei har fått orden på økonomien.


Orden på økonomien ja. Kommunestyret har rasert ein sjukeheim og rehaben, dei har ikkje bygd ungdomsskulen som alle partia lovde oss i 2003, Alcatraz er vekke og kommunen er heilt ute av stand til å gjennomføra store prosjekt som kjem innbyggjarane til gode. Ostehøvelprinsippet har kommunen brukt til det ikkje er meir ost att. Ein kan ikkje kutta seg til betre økonomi og betre velferd, men likevel er det det kommunen prøver på. Heile kommunestyret står saman om raseringa av velferdstilbodet vårt, men Ap står åleine om å forsvara det.

Så kjem Høgre og Frp og kritiserer Ap for akkurat dette. Men kva er Høgre og Frp si løysing på problemet? Jo, streng økonomistyring. Og streng økonomistyring, det er fleire nedskjeringar det. Høgre og Frp vil altså kutta enno meir enn det dei andre partia har gjort. Men kor dei skal kutta, det er Høgre og Frp for feige til å seia.

År for år får kommunane ein mindre del av kaka. Regjeringa lovde at dei skulle retta opp kommuneøkonomien. Ja, me har fått større overføringar dei to siste åra, men det held berre så vidt til å dekkja prisstigninga, og er langt frå nok til å dekkja opp for mange år med manglande vedlikehald og renter på lån ein ikkje kan betala. Regjeringa har to år til på seg. Men det er avgjerande at lokalpartia ikkje let lojaliteten til statsbudsjettet og partia sine gå føre lojaliteten til sin eigen kommune. Kommunen må gjennom media og gjennom ”fagforeininga” si, Kommunenes Sentralforbund, seia klart ifrå at kommunesektoren må få nok pengar til å retta opp økonomien sin.

Alle partia som er representert på Stortinget i dag, har delteke i vedtak om statsbudsjett. Så den einaste i kommunestyret som ikkje har medansvar for den elendige kommuneøkonomien, må vera Fredrik Litleskare i Demokratane.

RV meiner at kommunane treng 20 milliardar som eit strakstiltak for å betala gjeld, manglande vedlikehald og anna etterslep på utgiftssida. Deretter, med god styring av kommunen, kan me få ei effektiv drift av kommunen, som på sikt vil føra til at kommunen vil spara mykje pengar. Ein kan ikkje vedta seg til effektiv drift, og ein kan ikkje driva effektivt når ein ikkje har råd til det, det er noko alle i næringslivet veit. Rart at ikkje høgresida i politikken har forstått dette, dei som alltid hyllar det private næringslivet sin effektivitet…

Mohamed Kallel

onsdag 29. august 2007

Stand på Leirvik i helga

Førstkomande laurdag, 1. september frå klokka 11.00 kan du møta Hordaland RV sin førstekandidat til fylkestingsvalet, Sunniva Schultze-Florey, på standen vår på Leirvik.

Sunniva er 22 år gamal og student ved universitetet i Bergen. Ho har vore RV sin gruppeleiar på fylkestinget i perioden 2003-2007, og satsar på ein plass i fylkesutvalet i neste periode. Sunniva har vore politisk aktiv sidan ho var 15 år, og er særleg oppteken av utdannings- og distriktspolitikk.

Den største bragden til Sunniva i utdanningskomiteen og fylkestinget den forrige perioden var at ho fekk med seg fylkestinget på å betala for skule-PCane til elevane på vidaregåande.

- Vent til etter valet!

Kommunedelplanen for Leirvik har vist seg å verta ei av dei viktigaste og mest omtalte sakene i årets valkamp. Likevel meiner kommunestyret at planen bør vedtakast før valet. Det er Raud Valallianse sterkt usamde i.

– Ei så viktig sak bør ein venta med til etter valet, så innbyggjarane får ha eit ord med i laget. Stortinget har ein udemokratisk tradisjon med å vedta viktige saker rett før valet, la ikkje kommunen vår innføra den same tradisjonen, seier Mohamed Kallel, Stord RV sin toppkandidat ved kommunevalet. – Sjølv om saka er ferdig utgreidd og handsama av administrasjonen og alle høyringsinstansar, vil det vera udemokratisk å vedta saka før valet, særleg når saka truleg er svært viktig for mange sitt val av parti i år, legg han til.

– Lokalpolitikarane si manglande vilje til å styra utviklinga i sentrum har ført til at handlegata vår no er i ferd med å døy ut, meiner Kallel. – Handelen flyttar seg dit handelskapitalistane ser at dei kan tena mest pengar. Då er det kommunestyret si oppgåva å halda imot, så jakta på profitt til handelsnæringa ikkje øydelegg trivselen og småbykjensla i sentrum. Denne oppgåva har kommunestyret i Stord forsømt, og ei viktig oppgåva i den komande perioden vert å revitalisera sentrum. Då er det sjølvsagt at det er det nye kommunestyret som bør vedta den planen som skal liggja til grunn for utviklinga vidare, avsluttar Mohamed Kallel.

Les meir om saka her

tysdag 28. august 2007

RV stør elevstreiken


RV/Raudt stør elevstreiken på torsdag der elevane protesterer mot manglande nynorske læremiddel ved skulestart. Det dreier seg om brot på det grunnleggjande kravet om å få læremiddel på eige språk.

- Det ser ikkje ut til at Djupedal og departementet hans bryr seg særleg mykje om å innfri dette kravet, seier Torstein Dahle, leiar i RV/Raudt.- Dette er ein streik som også bør få støtte frå elevar med bokmål som hovudmål, fordi det er eit svært viktig rettferdskrav, meiner han.

søndag 26. august 2007

Eit godt kulturtilbod i Stord kommune

Et godt kulturtilbud er en forutsetning for at folk skal kunna ha det bra. Samfunnsøkonomisk er det svært lønnsomt å satse på kultur, en får svært mye igjen, både direkte og indirekte. Et rikt kulturliv har god innvirkning på folk sin trivsel, og dermed på helsen vår. Det motvirker rasisme, skaper forståelse, bygger vennskap og bruer mellom mennesker.
Ikke minst er det et viktig bidrag til å forhindre fraflytting i distriktene.

Rød Valgallianse vil arbeide for å sikre et rikt og variert kulturliv i Stord kommune der ulike kunstarter, stilretninger og kulturer blir stimulert.

Kulturskolen må trygges og utvide tilbudet innenfor flere kunst og kulturuttrykk. RV vil arbeide for å senke satsene for foreldrebetaling slik at ingen blir utestengt fra tilbudet pga dårlig økonomi. Vi vil også øke kapasiteten, slik at det blir slutt på de lange ventelistene i kulturskolen.

Frivillige organisasjoner som tilbyr fritidsaktiviter til barn og unge må få bedre rammevilkår.
Kommunen må senke prisene på utleie av lokaler til frivillige lag og organisasjoner.
Kommunen må øke støtteordninger og bevilgninger til idrettsorganisasjoner, musikkkorps, internasjonal kulturklubb og andre som tilbyr fritidsaktiviter.

Stord RV vil arbeide for å senke egenandeler på kulturelle aktiviteter som f.eks kino, svømmebasseng.
Kommunen skal stille lokaler fritt til disposisjon for livssynsnøytrale seremonier, som navnefest, humanistisk konfirmasjon og lignende.

Stord RV vil arbeide for å etablere et permanent selvstyrt allaktivitetshus for ungdom i sentrum som kan gi et rusfritt tilbud også til de som ikke er aktivisert gjennom de tradisjonelle tilbudene – som idrett, kulturskole og bedehus.
Vi har et rikt kulturliv på Stord. Hadde kommunen brydd seg, og lagt bedre til rette for et mangfoldig kulturtilbud, kunne det imidlertid ha vært mye bedre. Vi trenger en kulturell oppvåkning i kommunestyret på Stord, og den vil Stord RV bidra til.

Einar Steinkopf
leder i Stord RV/ Raudt

torsdag 23. august 2007

Underhaldning i valkampen

Laurdag 25. august vert det dans i Borggata i samband med valkampen. Magdalena From Gniste skal ha eit danseopptrinn klokka 12.00 og 13.00. Møt opp!

Biletet viser Magdalena saman med 2. kandidaten vår, Maria Malmsten.

fredag 17. august 2007

Openheit og lokaldemokrati

Stord kommune har ein administrasjonsmodell der det meste er styrt av rådmann og byråkratar. Dei kommunale verksemdene er styrt av kommuneadministrasjonen og eit stort leiarsjikt, ikkje politikarane. Slik blir det lettare for kommunepolitikarane å skjera ned, det er nemleg leiarane ute i felt som må gjera dei umoglege prioriteringane.

Dei tradisjonelle partia ynskjer først og fremst å administrera kommunane, ikkje å driva med politikk. Lojaliteten til statsbudsjettet set partia i direkte konflikt med sine eigne program, og gjer det umogleg for dei å innfri valløfta sine. Politikken blir ein saus av dårlege kompromiss, innanfor rammer som gjer at han ikkje tenar andre enn næringsliv og kapital, i tillegg til politikarane sin posisjonshunger.

Stord RV vil ikkje herska, me vil vera folk sitt talerøyr i kommunestyret. Me treng folk i kommunestyret som ikkje let seg blinda av byråkratane og konsulentane sine ”gode råd” og ”fagkunnskap”.

Me vil kjempa for at brukarane og organisasjonane deira vert høyrte i større grad enn i dag. Avstanden mellom politikarane og folket må verta mindre. Me vil ta vare på innbyggjarane sin rett til innsyn og deltaking i avgjerder som vil tekne. Me godtar ikkje at vår oppgåve i kommunestyret skal vera å setja trengande og svake grupper opp imot kvarandre.

For å få ei god utvikling i kommunen sitt tenestetilbod er det òg naudsynt å nytta dei tilsette sine initiativ og erfaringar.

Stord RV vil at me som bur i kommunen skal spela ei større rolle. Openheit om avgjerder som angår oss alle er ein føresetnad for eit fungerande demokrati. Me vil flytta makta frå direktørar, økonomar og byråkratar til politikarane, og frå politikarar til folket.

RV er ikkje lojale mot statsbudsjettet, me er lojale mot veljarane våre og innbyggjarane sine behov. Me vil ikkje la oss binda til løyndom og kameraderi. At folk får innsyn i avgjerder og kan vera med på å påverka dei, avheng av at kommunen er open, og at offentlegheitslova blir følgd. Me vil ha opne møte i alle offentlege styringsorgan.

Mohamed Kallel
1. kandidat Stord RV

måndag 13. august 2007

Kandidatane våre

Foto: Eva Frøskjær Ersland

1. Mohamed Kallel er 44 år gamal og har tre born. Han kjem opphavleg frå Tunisia, og har budd i Noreg sidan 1989. Mohamed er sveisar ved Leirvik Module Technology, der han òg er vald som klubbleiar. Han har lang erfaring frå tillitsverv i fagrørsla og i RV, og er særleg oppteken av skule og industripolitikk.

2. Maria Malmsten er 43 år gamal og har seks born. Ho kjem frå Sverige og kom til Noreg i 1986. Maria er frilanssongar og dirigent, og jobbar i tillegg som veterinærassistent. Maria er særs oppteken av kultur- og miljøpolitikk.

3. Anbjørg Vattedal er 48 år og har tre born. Ho kjem frå Stord. Ho jobbar som vernepleiar på Stord sjukehus, og driv i tillegg med alternativ medisin. Anbjørg er særleg oppteken av helsepolitikk.

4. Stian Karlsen er 23 år gamal og kjem frå Stord. Han jobbar som elektrikar i Aker Kværner Elektro. På fritida spelar han trommer. Stian er oppteken av å få gode tilbod for ungdom i kommunen.

Heile lista vår kan du lesa her

fredag 10. august 2007

Valprogram

Programmet til Raudt Stord for perioden 2007-2011 er no ferdig, og ligg her.

onsdag 8. august 2007

Buss til folket - folk på bussen!

Tomme busskur er eit vanleg syn langs vegane våre. Men det synest ikkje Maria er noko rart i det heile.

Foto: Eva Frøskjær Ersland


Stord og Hordaland RV vil jobba for:
  • Eit kollektivtilbod som gjer det mogleg å klara seg utan bil
  • Forsøk med gratis bussar
  • Restriksjonar på bilbruk når kollektivtilbodet vert godt nok
  • Høgfartstog langs kysten
  • Meir person- og godstrafikk over på båt
  • Gul midtlina på riks- og fylkesvegar, to bussar må kunna møtast utan å rygga

Folkemøte

1. kandidaten vår, Mohamed Kallel, skal delta i folkemøte i turnhallen på Leirvik 29. august og på Sagvåg skule 3. september.

Me må våga å seia nei!


– Politikarane i Stord kommune har alt vist at dei er for lite viljuge til å styra utviklinga i kommunen. Det ser me resultatet av når sentrum døyr ut, all handel vert flytta til industriområdet Heiane, og private barnehagar poppar opp i tronge bustadfelt der det ikkje er plass til dei, skriv Mohamed Kallel i dette innlegget.

Les heile innlegget på innsida.no
(Foto:Eva Frøskjær Ersland)